საუკუნეზე მეტი ხნის განმავლობაში უდიდესი ალმასი აღმოაჩინეს
Lucara Diamond Corp.-მა ბოტსვანაში 1,111 კარატიანი საიუველირო ხარისხის ალმასი აღმოაჩინა, რომელიც ზომით მხოლოდ ბრიტანეთის სამეფო სამკაულებისთვის დაწახნაგებულ კულინანის ალმასს ჩამოუვარდება.
ვანკუვერში დაფუძნებული Lucara-ს მიხედვით, IIa ტიპის ქვა, რომელიც ჩოგბურთის ბურთზე ოდნავ პატარაა, ბოლო 100 წელზე მეტი ხნის განმავლობაში ყველაზე დიდი აღმოჩენილი ალმასია. კომპანიის განცხადებით, ის ცენტრალურ ბოტსვანაში, კაროვეს მაღაროს სამხრეთ ნაწილში მანქანების მიერ იქნა მოპოვებული.
„ჩვენ ყოველთვის ძალიან მაღალი წარმოდგენა გვქონდა ჩვენს რესურსზე“, — განაცხადა Lucara-ს აღმასრულებელმა დირექტორმა უილიამ ლამბმა ხუთშაბათს ინვესტორებთან სატელეფონო საუბრისას. „ძალიან თამამი ადამიანი უნდა იყო, ასეთი ქვის აღმოჩენა რომ იწინასწარმეტყველო.“
Lucara-ს კაროეს მაღარო ბოტსვანაში კონკურენციას უწევს Gem Diamonds Ltd.-ის ლეტსენგის საბადოს ლესოთოში, როგორც მსოფლიოს უდიდესი და საუკეთესო ქვების წყარო. Gem Diamonds-ს მანამდე ეკუთვნოდა ამ საუკუნეში აღმოჩენილი უდიდესი ქვის რეკორდი 603-კარატიანი „ლესოთოს დაპირებით“ (Lesotho Promise).
"თითქმის შეუძლებელია ასეთი არაჩვეულებრივი ქვის ღირებულების შეფასება, თუ გავითვალისწინებთ, რომ ფასის დადგენა დიდად არის დამოკიდებული ფერის, სისუფთავის, თლისა და გაპრიალების მახასიათებლებზე", - დაწერა ხუთშაბათს თავის ჩანაწერში BMO Capital Markets-ის ლონდონელმა ანალიტიკოსმა ედვარდ სტერკმა.
Lucara-მ ივლისში 341,9-კარატიანი IIa ტიპის ალმასი $20,6 მილიონად, ანუ კარატი $60 000-ად გაყიდა, განაცხადა სტერკმა. კომპანიის აქციები ტორონტოს ბირჟაზე 37 პროცენტამდე გაიზარდა, რაც 2008 წლის შემდეგ დღის განმავლობაში ყველაზე მკვეთრი მატებაა.
ნაპოვნი ქვის ღირებულება და ის, თუ ვინ მოისურვებს მის შეძენას, დამოკიდებული იქნება იმ დაწახნაგებული და გაპრიალებული ქვების ზომასა და ხარისხზე, რომელთა მიღებაც მისგან იქნება შესაძლებელი. მიუხედავად იმისა, რომ Lucara მას სავარაუდოდ ბოტსვანაში გამართულ ტენდერზე გაყიდის, დაწახნაგებას, გაპრიალებასა და საბოლოო მფლობელზე მიყიდვას შესაძლოა მრავალი წელი დასჭირდეს. ანტვერპენი და ნიუ-იორკი განსაკუთრებული საიუველირო თვლების დამუშავების წამყვანი ცენტრებია.
ქვის ღირებულება
ლემბის თქმით, ნაკლებად სავარაუდოა, რომ ქვა წელს გაიყიდოს. ის ზედმეტად დიდია მათ სკანერში მოსათავსებლად და მისი წაღება მოუწევთ ანტვერპენში, სადაც, როგორც ის იმედოვნებს, უფრო დიდი სკანერი აღმოჩნდება.
„უნდა ვნახოთ, როგორ შეგვიძლია ამ ქვისგან მაქსიმალური ღირებულების მიღება“, — განაცხადა ლამბმა. — „ქვის სრულად შესასწავლად დრო დაგვჭირდება“.
როგორც წესი, ისეთი იუველირი, როგორიცაა Graff Diamonds Corp., ან ინვესტორთა ჯგუფი ყიდულობს საიუველირო თვალს და იყენებს კომპიუტერული სკანირების ტექნოლოგიას, რათა გადაწყვიტოს, როგორ დაჭრას ქვა რამდენიმე ნაწილად ყველაზე მომგებიანად და ჩასვას ისინი სამკაულებში, — აცხადებს მორის მეისონი, ლონდონში მდებარე Stifel Nicolaus Europe Ltd.-ის სამთო-მოპოვებითი სფეროს ანალიტიკოსი.
Graff დიდი ქვების ყველაზე აქტიური შემსყიდველია, მათ შორის Gem Diamonds-ის „Lesotho Promise“-ის, რომელშიც მან $12.4 მილიონი გადაიხადა. Graff-მა ის 26 უნაკლო ალმასად დაამუშავა, მათ შორის 76.4-კარატიან მსხლის ფორმის საიუველირო თვლად, და ისინი ერთ ყელსაბამში გააერთიანა. ყელსაბამი ჯერ არ გაყიდულა. „კულინანი“ ხელით დაიჭრა ცხრა მსხვილ და 96 შედარებით პატარა ქვად.
"საბოლოო მყიდველი, სავარაუდოდ, უკიდურესად მდიდარი ალმასების კოლექციონერი იქნება," — განაცხადა მარტინ პოტსმა, ლონდონში დაფუძნებულმა FinnCap Ltd.-ის სამთო-მოპოვებითი სფეროს ანალიტიკოსმა. "უდიდესი პრესტიჟი იქნება ყველაზე დიდი ისეთი ალმასის ფლობა, რომელიც სამეფო კოლექციის ნაწილი არ არის."
Sotheby’s-ის აუქციონი
გასულ კვირას ჰონგ-კონგელმა მილიარდერმა ჯოზეფ ლაუმ ჟენევაში, Sotheby’s-ის აუქციონზე, 12.03-კარატიან ლურჯ ალმასში 48.6 მილიონი შვეიცარიული ფრანკი ($48.4 მილიონი) გადაიხადა, რაც აუქციონზე ძვირფასეულობაში გადახდილი ყველაზე დიდი თანხაა. ერთი დღით ადრე კი მან 16.08-კარატიან ვარდისფერ ალმასში 28.7 მილიონი ფრანკი გადაიხადა. მისი ოფისის განცხადებით, ორივე შენაძენი მისი 7 წლის ქალიშვილისთვის იყო განკუთვნილი.
ჯერჯერობით, ყველაზე დიდი ზომის ალმასები უძლებენ ფასების ვარდნას, რამაც მთლიანი ინდუსტრია დააზარალა. კომპანია Gem Diamonds-ის 10 კარატზე მეტი წონის ქვების ფასები გასულ წელს დაახლოებით 5 პროცენტით შემცირდა, განაცხადა გასულ კვირას აღმასრულებელმა დირექტორმა კლიფორდ ელფიკმა. ეს მაჩვენებელი უპირისპირდება ზოგიერთი უფრო მცირე ზომის საიუველირო თვლის ფასების 30 პროცენტამდე კლებას.
აღმოჩენილთა შორის ყველაზე დიდი ალმასი არის 3,106-კარატიანი „კულინანი“ (Cullinan), რომელიც 1905 წელს სამხრეთ აფრიკაში, პრეტორიის მახლობლად იპოვეს. მისგან დაამზადეს „აფრიკის დიდი ვარსკვლავი“ და „აფრიკის მცირე ვარსკვლავი“, რომლებიც ბრიტანეთის სამეფო რეგალიებშია ჩასმული.
Lucara-მ ასევე განაცხადა, რომ მან კიდევ ორი ძალიან დიდი თეთრი ალმასი აღმოაჩინა. პირველი გაწმენდამდე 813 კარატს იწონის, რაც ნიშნავს, რომ ის სავარაუდოდ ნაპოვნ 10 უდიდეს ქვას შორის მოხვდება. მეორე კი 374 კარატია.
„ეს არის მოვლენა, რომელიც ფინანსურ ბალანსს ცვლის“ Lucara-სთვის, ნათქვამია Investec Plc-ის ხუთშაბათის განცხადებაში.
წყარო: bloomberg
