ពេជ្រធំបំផុតក្នុងរយៈពេលជាងមួយសតវត្សរ៍ត្រូវបានជីករកឃើញនៅប្រទេសបុតស្វាណា

ពេជ្រធំបំផុតក្នុងរយៈពេលជាងមួយសតវត្សរ៍ត្រូវបានជីករកឃើញ

ពេជ្រគុណភាពត្បូងទម្ងន់ 1,111 ការ៉ាត់ ដែលមានទំហំធំលំដាប់ទីពីរបន្ទាប់ពីពេជ្រ Cullinan ដែលត្រូវបានច្នៃដាក់ក្នុងគ្រឿងអលង្ការមកុដរាជវង្សអង់គ្លេស ត្រូវបានជីករកឃើញដោយក្រុមហ៊ុន Lucara Diamond Corp. នៅក្នុងប្រទេសបុតស្វាណា។
ត្បូងប្រភេទ Type-IIa នេះ មានទំហំតូចជាងបាល់វាយកូនបាល់បន្តិច គឺជាការរកឃើញពេជ្រដ៏ធំបំផុតក្នុងរយៈពេលជាង 100 ឆ្នាំមកនេះ នេះបើយោងតាមក្រុមហ៊ុន Lucara ដែលមានមូលដ្ឋាននៅទីក្រុង Vancouver។ ក្រុមហ៊ុនបាននិយាយនៅក្នុងសេចក្តីថ្លែងការណ៍មួយថា វាត្រូវបានរកឃើញដោយម៉ាស៊ីននៅផ្នែកខាងត្បូងនៃអណ្តូងរ៉ែ Karowe ភាគកណ្តាលប្រទេសបុតស្វាណា។

"យើងតែងតែវាយតម្លៃខ្ពស់លើធនធានរបស់យើងជានិច្ច" លោក William Lamb នាយកប្រតិបត្តិនៃក្រុមហ៊ុន Lucara បានថ្លែងនៅក្នុងកិច្ចសន្ទនាតាមទូរស័ព្ទជាមួយវិនិយោគិនកាលពីថ្ងៃព្រហស្បតិ៍។ “អ្នកត្រូវតែជាមនុស្សដ៏ក្លាហានបំផុត ទើបហ៊ានទស្សន៍ទាយថាមានត្បូងបែបនេះ។”

អណ្តូងរ៉ែ Karowe របស់ក្រុមហ៊ុន Lucara នៅក្នុងប្រទេសបុតស្វាណា កំពុងប្រកួតប្រជែងជាមួយប្រតិបត្តិការអណ្តូងរ៉ែ Letseng របស់ក្រុមហ៊ុន Gem Diamonds Ltd. នៅក្នុងប្រទេសឡេសូតូ ក្នុងនាមជាប្រភពនៃត្បូងដែលធំជាងគេ និងល្អបំផុតរបស់ពិភពលោក។ ក្រុមហ៊ុន Gem Diamonds ធ្លាប់កាន់កាប់កំណត់ត្រាសម្រាប់ត្បូងធំជាងគេដែលត្រូវបានរកឃើញនៅក្នុងសតវត្សរ៍នេះ ជាមួយនឹងត្បូង Lesotho Promise ទម្ងន់ 603 ការ៉ាត់។

"វាស្ទើរតែមិនអាចទៅរួចទេក្នុងការប៉ាន់ប្រមាណតម្លៃសម្រាប់ត្បូងដ៏អស្ចារ្យបែបនេះ ដោយសារការវាយតម្លៃគឺអាស្រ័យយ៉ាងខ្លាំងទៅលើពណ៌ ភាពថ្លា និងលក្ខណៈនៃការកាត់ និងការប៉ូលា" លោក Edward Sterck អ្នកវិភាគដែលមានមូលដ្ឋាននៅទីក្រុងឡុងដ៍នៃក្រុមហ៊ុន BMO Capital Markets បានសរសេរនៅក្នុងកំណត់ត្រាមួយកាលពីថ្ងៃព្រហស្បតិ៍។

លោក Sterck បាននិយាយថា ក្រុមហ៊ុន Lucara បានលក់ពេជ្រប្រភេទ Type-IIa ទម្ងន់ 341.9 ការ៉ាត់ កាលពីខែកក្កដាក្នុងតម្លៃ $20.6 លានដុល្លារ ឬ $60,000 ក្នុងមួយការ៉ាត់។ ភាគហ៊ុនរបស់ក្រុមហ៊ុនបានហក់ឡើងរហូតដល់ 37 ភាគរយនៅក្នុងការជួញដូរនៅទីក្រុងតូរ៉ុនតូ ដែលជាការកើនឡើងប្រចាំថ្ងៃខ្ពស់បំផុតមិនធ្លាប់មានចាប់តាំងពីឆ្នាំ 2008 មក។

តម្លៃនៃរបកគំហើញនេះ និងអ្នកដែលចង់ទិញវា នឹងអាស្រ័យលើទំហំ និងគុណភាពនៃដុំត្បូងកែច្នៃរួចដែលអាចកាត់ចេញពីវាបាន។ ខណៈពេលដែលក្រុមហ៊ុន Lucara ទំនងជានឹងលក់វាដោយការដេញថ្លៃនៅប្រទេសបុតស្វាណា ការកាត់ ការខាត់ និងការលក់ចុងក្រោយទៅឱ្យម្ចាស់ចុងក្រោយអាចចំណាយពេលច្រើនឆ្នាំ។ ទីក្រុង Antwerp និងទីក្រុង New York គឺជាមជ្ឈមណ្ឌលកាត់ត្បូងឈានមុខគេសម្រាប់ត្បូងដ៏អស្ចារ្យ។

តម្លៃរបស់ត្បូង

លោក Lamb បាននិយាយថា ថ្មនេះទំនងជាមិនអាចលក់ចេញនៅឆ្នាំនេះបានទេ។ វាធំពេកមិនអាចដាក់ចូលម៉ាស៊ីនស្កែនរបស់ពួកគេបាន ហើយត្រូវយកទៅកាន់ទីក្រុង Antwerp ជាកន្លែងដែលគាត់សង្ឃឹមថានឹងមានម៉ាស៊ីនស្កែនធំជាងនេះ។

លោក Lamb បាននិយាយថា៖ «យើងត្រូវពិនិត្យមើលថា តើយើងអាចទទួលបានតម្លៃខ្ពស់បំផុតពីត្បូងនេះដោយរបៀបណាឱ្យបានល្អបំផុត។ វានឹងត្រូវការពេលវេលាដើម្បីឱ្យយើងយល់ដឹងពេញលេញអំពីត្បូងនេះ»។

យោងតាមលោក Maurice Mason អ្នកវិភាគផ្នែករ៉ែនៅក្រុមហ៊ុន Stifel Nicolaus Europe Ltd. ក្នុងទីក្រុងឡុងដ៍ បានឱ្យដឹងថា ជាទូទៅ អ្នកលក់គ្រឿងអលង្ការដូចជាក្រុមហ៊ុន Graff Diamonds Corp. ឬក្រុមអ្នកវិនិយោគ នឹងទិញត្បូងនោះ ហើយប្រើបច្ចេកវិទ្យាស្កេនតាមកុំព្យូទ័រដើម្បីសម្រេចចិត្តថាតើត្រូវកាត់ត្បូងនោះជាច្រើនដុំដោយរបៀបណាដើម្បីទទួលបានប្រាក់ចំណេញច្រើនបំផុត និងដាំវានៅក្នុងគ្រឿងអលង្ការ។

ក្រុមហ៊ុន Graff គឺជាអ្នកទិញដ៏សកម្មបំផុតនូវត្បូងទំហំធំៗ រួមទាំងត្បូង Lesotho Promise របស់ក្រុមហ៊ុន Gem Diamonds ដែលខ្លួនបានចំណាយប្រាក់ចំនួន $12.4 លានដុល្លារ។ Graff បានច្នៃវាទៅជាពេជ្រឥតខ្ចោះចំនួន 26 គ្រាប់ រួមទាំងត្បូងរាងផ្លែសារីទម្ងន់ 76.4 ការ៉ាត់ ហើយបានច្នៃវាទៅជាខ្សែកតែមួយ។ ខ្សែកនេះមិនទាន់ត្រូវបានលក់នៅឡើយទេ។ ចំណែកឯត្បូង Cullinan ត្រូវបានច្នៃដោយដៃទៅជាត្បូងធំៗចំនួន 9 គ្រាប់ និងត្បូងតូចៗចំនួន 96 គ្រាប់។
លោក Martin Potts អ្នកវិភាគផ្នែករ៉ែដែលមានមូលដ្ឋាននៅទីក្រុងឡុងដ៍នៃក្រុមហ៊ុន FinnCap Ltd. បាននិយាយថា "អ្នកទិញចុងក្រោយទំនងជាអ្នកប្រមូលទិញពេជ្រដែលមានទ្រព្យសម្បត្តិមហាសាលបំផុត"។ "វានឹងមានកិត្យានុភាពយ៉ាងធំធេងក្នុងការក្លាយជាម្ចាស់ពេជ្រដ៏ធំបំផុត ដែលមិនមែនជាផ្នែកនៃការប្រមូលផ្តុំរបស់រាជវង្ស។"

ការដេញថ្លៃ Sotheby’s

កាលពីសប្ដាហ៍មុន មហាសេដ្ឋីហុងកុងលោក Joseph Lau បានចំណាយប្រាក់ 48.6 លានហ្វ្រង់ស្វីស ($48.4 លានដុល្លារ) នៅក្រុមហ៊ុន Sotheby’s ក្នុងទីក្រុងហ្សឺណែវ សម្រាប់ត្បូងពេជ្រពណ៌ខៀវទម្ងន់ 12.03 ការ៉ាត់ ដែលជាការចំណាយច្រើនបំផុតលើត្បូងគ្រឿងអលង្ការនៅក្នុងការដេញថ្លៃ។ មួយថ្ងៃមុននោះ លោកបានចំណាយប្រាក់ 28.7 លានហ្វ្រង់ សម្រាប់ត្បូងពេជ្រពណ៌ផ្កាឈូកទម្ងន់ 16.08 ការ៉ាត់។ ការិយាល័យរបស់លោកបាននិយាយថា ការទិញទាំងពីរនេះគឺសម្រាប់កូនស្រីអាយុ 7 ឆ្នាំរបស់លោក។

រហូតមកដល់ពេលនេះ ពេជ្រដែលមានទំហំធំបំផុតកំពុងទប់ទល់នឹងការធ្លាក់ចុះតម្លៃដែលបានវាយប្រហារដល់ឧស្សាហកម្មទាំងមូល។ នាយកប្រតិបត្តិ លោក Clifford Elphick បាននិយាយកាលពីសប្តាហ៍មុនថា តម្លៃសម្រាប់ត្បូងរបស់ក្រុមហ៊ុន Gem Diamonds ដែលមានទំហំធំជាង 10 ការ៉ាត់ បានធ្លាក់ចុះប្រហែល 5 ភាគរយក្នុងរយៈពេលមួយឆ្នាំកន្លងមកនេះ។ ចំនួននេះគឺប្រៀបធៀបទៅនឹងការធ្លាក់ចុះរហូតដល់ 30 ភាគរយសម្រាប់ត្បូងតូចៗមួយចំនួន។

ពេជ្រធំជាងគេបំផុតដែលត្រូវបានរកឃើញគឺពេជ្រ Cullinan ទម្ងន់ 3,106 ការ៉ាត់ ដែលត្រូវបានរកឃើញនៅក្បែរទីក្រុង Pretoria ប្រទេសអាហ្វ្រិកខាងត្បូង ក្នុងឆ្នាំ 1905។ វាត្រូវបានកាត់កែច្នៃបង្កើតជាពេជ្រ Great Star of Africa និង Lesser Star of Africa ដែលត្រូវបានដាំនៅក្នុងគ្រឿងអលង្ការរាជវង្សនៃចក្រភពអង់គ្លេស។

ក្រុមហ៊ុន Lucara ក៏បានបញ្ជាក់ផងដែរថា ខ្លួនបានរកឃើញពេជ្រពណ៌សដ៏ធំពីរគ្រាប់ទៀត។ គ្រាប់ទីមួយមានទម្ងន់ 813 ការ៉ាត់មុនពេលសម្អាត ដែលមានន័យថាវាទំនងជាជាប់ចំណាត់ថ្នាក់ក្នុងចំណោមពេជ្រធំជាងគេទាំង 10 ដែលត្រូវបានរកឃើញ។ គ្រាប់ទីពីរមានទម្ងន់ 374 ការ៉ាត់។
ក្រុមហ៊ុន Investec Plc បាននិយាយនៅក្នុងកំណត់ត្រាមួយកាលពីថ្ងៃព្រហស្បតិ៍ថា “នេះគឺជាការវិវត្តដែលផ្លាស់ប្តូរតារាងតុល្យការ” សម្រាប់ក្រុមហ៊ុន Lucara។

ប្រភព៖ bloomberg