Unique Pink
მსოფლიოში უდიდესი Fancy Vivid კატეგორიის მსხლის ფორმის ვარდისფერი ალმასი, რომელიც ოდესმე გატანილა ჟენევაში Sotheby's-ის აუქციონზე — Unique Pink, რომელიც 31,6 მილიონ დოლარად გაიყიდა.
ყველა საიუველირო თვალი და ფერადი ალმასი შეუიარაღებელი თვალით უნდა ნახოთ მათი ფერის შესაფასებლად, რადგან პირველი ვიზუალური შთაბეჭდილება მნიშვნელოვანია. ფერის აღწერილობის მხოლოდ სერტიფიკატიდან წაკითხვა სრულ სურათს ვერ შეგიქმნით.
ვარდისფერ ალმასებს შეიძლება ჰქონდეთ მრავალფეროვანი ელფერი — მოიისფროდან მონარინჯისფრომდე და მოწითალომდე, ხოლო ამ ალმასს აქვს საოცარი, ენერგიული ვარდისფერი ფერი, რომელსაც თითქოს წითლის მსუბუქი ელფერი დაჰკრავს, რაც მას მართლაც უნიკალურს ხდის. სხვა ფერადი ალმასებისგან განსხვავებით, სადაც შეფერილობა გამოწვეულია სხვა ატომის, მაგალითად, აზოტის ან ბორის მინარევით, ვარდისფერ ალმასებში ფერი ჩნდება კრისტალური სტრუქტურის დეფორმაციის ან წნევის გამო, რაც მილიონობით წლის წინ მისი ფორმირებისას მოხდა.
15,38-კარატიანი ალმასი Unique Pink დაწახნაგებულია Cora International-ის მიერ — კომპანიის, რომელიც მთელ მსოფლიოში ცნობილია დიდი ზომისა და მკვეთრი ფანტაზიური ფერების იშვიათი ალმასების წარმოებით. ამ დაუმუშავებელი კრისტალის დაწახნაგებისა და გაპრიალების პროცესი დაიწყებოდა მრავალთვიანი ფიქრით იმაზე, თუ როგორ გამოევლინათ ფერის მაქსიმალური პოტენციალი, და მსოფლიოში სულ რამდენიმე ოსტატია, ვინც ამ გამოწვევას გაუმკლავდებოდა.
ნებისმიერი ალმასის დაწახნაგება გარკვეულ რისკთან არის დაკავშირებული, ხოლო ფერადი ქვის დამუშავება კიდევ უფრო რთულია, რადგან საჭიროა ფერი რაც შეიძლება მკვეთრი გახდეს ქვის ცენტრიდან მისი გამოსხივების ხარჯზე. თეთრი ალმასების დაწახნაგებისას კი საპირისპირო ტაქტიკაა საჭირო, რათა ისინი უფეროდ გამოიყურებოდეს. ძალიან რთულია ვარდისფერი ალმასის საბოლოო ფერის განსაზღვრა სახეხ დისკზე მუშაობისას, რადგან ის შეიძლება მომენტალურად გაცხელდეს და ფერი შეიცვალოს, ამიტომ ოსტატი რეალურ შედეგს მხოლოდ ალმასის გაგრილების შემდეგ დაინახავს.
ამერიკის გემოლოგიური ინსტიტუტი (GIA) აფასებს მსოფლიოს თითქმის ყველა უმნიშვნელოვანეს ალმასს და ლაბორატორიაში ყოველწლიურად წარდგენილი ალმასებიდან არაუმეტეს სამი პროცენტისა კლასიფიცირდება, როგორც ფერადი ალმასი. ამ ფერადი ალმასების ხუთ პროცენტზე ნაკლებია უპირატესად ვარდისფერი. ეს ქვა ასევე მიეკუთვნება IIa ტიპს, რაც ქიმიურად ყველაზე სუფთა ტიპის ალმასია აზოტის არარსებობის გამო. მოპოვებული ალმასების მხოლოდ ორი პროცენტი გამოირჩევა ასეთი განსაკუთრებული გამჭვირვალობით.
გარდა იმისა, რომ ახალი მფლობელი ბუნების ერთ-ერთ უიშვიათეს საიუველირო თვალს შეიძენს, მას შეეძლება ქვას ახალი სახელიც დაარქვას, რაც მის უნიკალურობას კიდევ უფრო გაუსვამს ხაზს.
