„საიუბილეო ლალი“ (The Jubilee Ruby): ცეცხლოვანი 15.99-კარატიანი მოგოკის ლალი ყველაზე ძვირადღირებული ფერადი საიუველირო თვალია, რომელიც კი ოდესმე გაყიდულა აუქციონზე შეერთებულ შტატებში
ფერადი საიუველირო თვლების ღირებულება იზრდება, რადგან მყიდველები უფრო მეტად აფასებენ მათ სილამაზესა და იშვიათობას. მათზე არსებული მაღალი ფასების მიუხედავადაც კი, მათი ხელმისაწვდომობა ახლოსაც ვერ მიდის მაღალი საერთაშორისო მოთხოვნის დაკმაყოფილებასთან. ამიტომ, შესაძლოა, გასაკვირი არც იყოს, რომ „Jubilee Ruby“ — თავისი კალიბრის ყველაზე მნიშვნელოვანი ლალი, რომელიც ბოლო 25 წელზე მეტი ხნის განმავლობაში აშშ-ში აუქციონზე გასაყიდად გამოიტანეს — გახდა ყველაზე ძვირადღირებული ფერადი საიუველირო თვალი, რომელიც კი ოდესმე გაყიდულა აუქციონზე ამერიკაში, როდესაც 20 აპრილს ნიუ-იორკში, Christie’s-ის აუქციონზე მან $14,165,000 (£9.86 მილიონი) მიაღწია.
15.99-კარატიანი „საიუბილეო ლალი“ (Jubilee Ruby) ბოლო ხუთი წლის განმავლობაში აუქციონზე გატანილი სიდიდით მეორე ლალია და მისი სავარაუდო ღირებულება $12-15 მილიონს შეადგენდა. იმის გასაგებად, თუ რატომ აღწევს ლალის ფასი ასეთ რეკორდულ ნიშნულებს, სასარგებლოა მათ ისტორიას ჩავუღრმავდეთ.
უძველესი ცივილიზაციები ლალს უდავოდ ყველაზე ძვირფას საიუველირო თვლად მიიჩნევდნენ ბუნებაში. ლალში გადახდილი ფასი ბევრად აღემატებოდა ალმასის ღირებულებას, რაც გასაგებია, რადგან ალმასი საიდუმლოდ რჩებოდა მანამ, სანამ ადამიანმა დედამიწაზე ყველაზე მაგარი მასალის დაწახნაგება არ შეძლო 1400-იან წლებში.
მანამ, სანამ მინერალოგია ქიმიისა და ფიზიკის დახმარებით მეცნიერებად ჩამოყალიბდებოდა, წითელი ქვების ერთმანეთისგან გარჩევა რთული იყო, ამიტომ შპინელები, ბერილები და გრანატები (ძოწები) ხშირად ლალში ერეოდათ. დღესდღეობით გემოლოგებს შეუძლიათ დაადგინონ არა მხოლოდ ის, თუ რა ქვაა, არამედ მისი წარმოშობის ადგილიც, რასაც ლალის სამყაროში დიდი მნიშვნელობა აქვს.
ლალის პოვნა მრავალ ადგილას შეიძლება, მაგრამ ისტორიულად ბირმის (მიანმარი) ლეგენდარული მაღაროები ყველაზე ლამაზ ნიმუშებს იძლეოდა. მე-19 საუკუნის შუა ხანებამდე მხოლოდ ბირმის მონარქს ან მის მიერ ღირსეულად მიჩნეულ პირს ჰქონდა ასეთი დიდებული საიუველირო თვლის ფლობის პრივილეგია.
ეს ქვები მოიპოვება მიწისქვეშა მარმარილოს ღრმა ფენებში, მიანმარის ჩრდილოეთ ნაწილში მდებარე მოგოკის ხეობაში. ხეობის სიგრძე მხოლოდ ორი მილია, ხოლო სიგანე — ნახევარი მილი, თუმცა ზოგიერთი მაღაროს სიღრმე 400 მეტრს აღწევს და ისინი დღემდე მოქმედია.
როგორც ყველა ფერადი საიუველირო თვლის შემთხვევაში, სწორედ ფერის ინტენსივობა, ტონი, ელფერი, ნაჯერობა და თანაბრობაა მნიშვნელოვანი იმისათვის, რომ საიუველირო თვალი სასურველი გახდეს. მოგოკის ლალები გამოირჩევა ქრომის მაღალი და რკინის დაბალი შემცველობით, რაც შეფერილობის განმსაზღვრელი ელემენტებია და მათ დამატებით „ცეცხლს“ სძენს. მათ ასევე ახასიათებთ ბუნებრივი ფლუორესცენცია, რომელიც აძლიერებს ფერის სიკაშკაშეს და ქვებს აცოცხლებს, თითქოს ისინი შიგნიდან იყოს განათებული.
„საიუბილეო ლალი“ (Jubilee Ruby) ძველი ბალიშისებრი ფორმის ქვაა, რაც მკაფიოდ მიუთითებს იმაზე, რომ იგი ძველი საბადოდანაა მოპოვებული. ის მშვენივრად არის ჩასმული ცნობილი იუველირის, Verdura-ს მიერ შექმნილ 18-კარატიანი ყვითელი ოქროსა და ალმასის ბუდეში და, უდავოდ, Christie’s-ის აუქციონის მთავარი მოვლენა იყო.
წყარო: telegraph.co.uk
