ლურჯი ალმასის ახალი მსოფლიო რეკორდი
ლურჯმა ალმასმა აუქციონზე სამკაულებს შორის რეკორდული ფასი დააფიქსირა, როდესაც ჟენევაში Christie’s აუქციონზე $58 მილიონად გაიყიდა.
14.62 კარატიანი Oppenheimer Blue-ს სავარაუდო ღირებულება $46 მილიონს აღწევდა. Christie’s-მა ოთხშაბათს გვიან ღამით, აუქციონის დასრულების შემდეგ განაცხადა, რომ სამ კონტინენტზე მყოფ მყიდველებს შორის 25-წუთიანი ბრძოლის შედეგად, ქვა ახლა კერძო კოლექციონერს ეკუთვნის. საიუველირო თვალი მისი წინა მფლობელის, სერ ფილიპ ოპენჰაიმერის სახელს ატარებს, რომლის ოჯახიც წილის გაყიდვამდე 80 წლის განმავლობაში აკონტროლებდა De Beers-ს.
ალმასი ჩასმულია პლატინის ბეჭედში და ორივე მხრიდან ტრაპეციის ფორმის ალმასებით არის გარშემორტყმული. მისი სისუფთავის VVS1 კატეგორია ერთი საფეხურით ჩამორჩება შინაგანად უნაკლო (Internally Flawless) დონეს. თავდაპირველად ალმასი Verdura-ს „Eight Blades“ ბუდეში იყო ჩასმული.
წინასწარი შეფასებით, Oppenheimer Blue-ს ფასი $38-დან $45 მილიონამდე მერყეობდა, თუმცა რეალურმა გასაყიდმა ფასმა მოლოდინს $10 მილიონზე მეტით გადააჭარბა.
ლურჯი ალმასები მსოფლიოში ყველაზე იშვიათია. წინა რეკორდი ჰონგ-კონგელმა მილიარდერმა ჯოზეფ ლაუმ დაამყარა, რომელმაც გასულ წელს Sotheby’s-ის აუქციონზე 12.03-კარატიან ფანტაზიურ ლურჯ ალმასში, სახელწოდებით „Blue Moon“, თითქმის $50 მილიონი გადაიხადა. მსოფლიოს უდიდესი და უიშვიათესი ალმასები ფასების ბოლოდროინდელი ვარდნის მიმართ მდგრადი აღმოჩნდა.
ბოლო დროს საიუველირო თვლების სააუქციონო ბაზარი ხელოვნების ნიმუშების ბაზარზე უფრო ძლიერია. გასულ კვირას ნიუ-იორკში, Christie’s-ის, Sotheby’s-ისა და Phillips-ის წამყვან აუქციონებზე იმპრესიონისტული, მოდერნისტული, ომისშემდგომი და თანამედროვე ხელოვნების ნიმუშების გაყიდვებმა გასულ წელთან შედარებით 50 პროცენტით ნაკლები შემოსავალი მოიტანა. Oppenheimer Blue-ს გაყიდვა მოჰყვა სამშაბათს, ჟენევაში Sotheby’s-ის მიერ გამართულ სამკაულების რეკორდულ, $175-მილიონიან აუქციონს.
გასულ წელს დაუმუშავებელი ალმასების ფასები 18 პროცენტით დაეცა, რაც ყველაზე დიდი ვარდნაა 2008 წლის ფინანსური კრიზისის შემდეგ.
ლურჯ ფერს განაპირობებს ბორი, რომელიც შეკუმშული ნახშირბადის მასაშია მოქცეული.
ლურჯი ალმასები მსოფლიოში ყველაზე იშვიათია. წინა რეკორდი ჰონგ-კონგელმა მილიარდერმა ჯოზეფ ლაუმ დაამყარა, რომელმაც გასულ წელს Sotheby’s-ის აუქციონზე 12.03-კარატიან ფანტაზიურ ლურჯ ალმასში, სახელწოდებით „Blue Moon“, თითქმის $50 მილიონი გადაიხადა.
