ក្រុមហ៊ុន De Beers បានប្រកាសដាក់ឱ្យដំណើរការក្រុមហ៊ុនថ្មីមួយឈ្មោះថា Lightbox Jewelry ដែលនឹងចាប់ផ្តើមធ្វើទីផ្សារម៉ាកយីហោថ្មីនៃគ្រឿងអលង្ការពេជ្រសំយោគក្រោមឈ្មោះ Lightbox នៅខែកញ្ញា ឆ្នាំ 2018 ដោយផ្តល់ជូនអតិថិជននូវការរចនាគ្រឿងអលង្ការម៉ូដទាន់សម័យដែលមានគុណភាពខ្ពស់ក្នុងតម្លៃទាបជាងពេជ្រសំយោគដែលមានស្រាប់នៅលើទីផ្សារ។
ពេជ្រសំយោគ Lightbox នឹងលក់រាយចាប់ពីតម្លៃ US$200 សម្រាប់ត្បូងទម្ងន់មួយភាគបួនការ៉ាត់ ដល់ US$800 សម្រាប់ត្បូងទម្ងន់មួយការ៉ាត់។ ស្រឡាយផលិតផលនេះនឹងនាំមកនូវអ្វីដែលថ្មី និងប្រកបដោយភាពច្នៃប្រឌិតដល់វិស័យគ្រឿងអលង្ការ ដោយមានបំពាក់នូវពេជ្រសំយោគពណ៌ផ្កាឈូក ពណ៌ខៀវ និងពណ៌ស នៅក្នុងជម្រើសនៃការរចនាក្រវិល និងខ្សែកដែលមានតម្លៃសមរម្យ។
លោក Bruce Cleaver នាយកប្រតិបត្តិនៃក្រុមហ៊ុន De Beers group បានមានប្រសាសន៍ថា៖ “Lightbox នឹងផ្លាស់ប្តូរវិស័យពេជ្រដាំដុះក្នុងមន្ទីរពិសោធន៍ ដោយផ្តល់ជូនអតិថិជននូវផលិតផលដាំដុះក្នុងមន្ទីរពិសោធន៍ដែលពួកគេបានប្រាប់យើងថាពួកគេចង់បាន ប៉ុន្តែមិនទាន់ទទួលបាន៖ នោះគឺគ្រឿងអលង្ការម៉ូដទាន់សម័យដែលមានតម្លៃសមរម្យ ដែលអាចនឹងមិនស្ថិតស្ថេរជារៀងរហូត ប៉ុន្តែវាល្អឥតខ្ចោះសម្រាប់ពេលបច្ចុប្បន្ននេះ។”
Lightbox នឹងដាក់ឱ្យដំណើរការនៅសហរដ្ឋអាមេរិក ហើយដំបូងឡើយនឹងមានលក់សម្រាប់អតិថិជនដែលរស់នៅក្នុងសហរដ្ឋអាមេរិកតាមរយៈគេហទំព័រពាណិជ្ជកម្មអេឡិចត្រូនិករបស់ Lightbox ដោយភាពជាដៃគូលក់រាយនឹងត្រូវប្រកាសនៅពេលវេលាសមស្របខាងមុខ។
ក្នុងនាមជាក្រុមហ៊ុនបុត្រសម្ព័ន្ធរបស់ក្រុមហ៊ុន De Beers group ម៉ាកយីហោ Lightbox នឹងក្លាយជាម៉ាកគ្រឿងអលង្ការតែមួយគត់ដែលទទួលបានពេជ្រសំយោគពីអាជីវកម្ម Element Six របស់ក្រុមហ៊ុន De Beers group ដែលជាក្រុមហ៊ុនឈានមុខគេលើពិភពលោកផ្នែកបច្ចេកវិទ្យាពេជ្រសំយោគអស់រយៈពេលជាង 50 ឆ្នាំមកហើយ។ ពេជ្រសំយោគ Lightbox ណាមួយដែលមានទម្ងន់ 0.2 ការ៉ាត់ ឬលើសពីនេះ នឹងមាននិមិត្តសញ្ញា Lightbox អចិន្ត្រៃយ៍នៅខាងក្នុងត្បូង។ មើលមិនឃើញដោយភ្នែកទទេ ប៉ុន្តែអាចសម្គាល់បានយ៉ាងងាយស្រួលក្រោមកែវពង្រីក និមិត្តសញ្ញានេះនឹងបញ្ជាក់យ៉ាងច្បាស់ថាត្បូងនេះជាត្បូងសំយោគ ហើយក៏ដើរតួជាសញ្ញាសម្គាល់គុណភាព និងការធានាថាវាត្រូវបានផលិតដោយ Element Six ផងដែរ។
ដើម្បីគាំទ្រដល់ Lightbox ក្រុមហ៊ុន De Beers group កំពុងវិនិយោគសរុបចំនួន US$94 លាន ក្នុងរយៈពេលបួនឆ្នាំ លើរោងចក្រផលិតថ្មីរបស់ Element Six ក្បែរទីក្រុង Portland រដ្ឋ Oregon សហរដ្ឋអាមេរិក ដែលជាការបន្ថែមលើរោងចក្រដែលមានស្រាប់របស់ Element Six ដែលមានមូលដ្ឋាននៅចក្រភពអង់គ្លេស។ នៅពេលដំណើរការពេញលេញ រោងចក្រនេះនឹងមានសមត្ថភាពផលិតពេជ្រសំយោគមិនទាន់កែច្នៃបានច្រើនជាង 500,000 ការ៉ាត់ក្នុងមួយឆ្នាំ។
សម្រាប់ព័ត៌មានបន្ថែម សូមចូលទៅកាន់ www.lightboxjewelry.com។
